Iran ta yi zanga-zanga ga Birtaniyya kan yunkurin masu adawa da juyin juya halin Musulunci a wajen rumfunan zabe a kasar ta Turai da nufin kawo cikas ga zaben shugaban kasa na Jamhuriyar Musulunci karo na 14.

Ministan harkokin wajen kasar Iran Ali Matinfar ya bayyana a jiya Lahadi cewa, ofishin jakadancin kasar Iran ya aike da sakon nuna rashin amincewa ga ma’aikatar harkokin wajen kasar Birtaniya bayan da wasu makiya suka musgunawa mahalarta zagayen farko na zaben a ranar Juma’a.

Ya kara da cewa sakon, ya kuma jaddada wajabcin kare tsaron Iraniyawa a zaben fidda gwani da za a yi.

Matinfar ya ci gaba da cewa, zai bibiyi wannan batu a ganawar da zai yi da jami’an ma’aikatar harkokin wajen Burtaniya a cikin wannan mako.

A ranar 28 ga watan Yuni, dubban Iraniyawa mazauna Birtaniya suka kada kuri’unsu a rumfunan zabe 10 da aka kafa a biranen London, Manchester, Birmingham, Newcastle, Glasgow da Cardiff domin zaben shugaban kasar Iran.

A sa’i daya kuma, wasu ‘yan adawa da dama sun yi zanga-zanga a wajen rumfunan zabe tare da la’antar masu kada kuri’a. ‘Yan sandan Burtaniya sun cafke wasu masu tayar da kayar baya shida.

Sai dai kuma an ci gaba da kada kuri’a ba tare da an dakata ba, kuma masu kada kuri’a sun nuna rashin amincewarsu da matakin da masu tarzoma suka dauka.