Al’ummar Tunusiya sun gudanar da zanga-zangar neman shugaban kasar Qais Sa’id da ya sauka daga kan mulkin kasar
Dubban ‘yan kasar Tunisiya sun gudanar da zanga-zanga a ranar Asabar a kan titin Habib Bourguiba da ke tsakiyar birnin Tunis don nuna rashin amincewarsu da tabarbarewar tattalin arziki da rayuwa da kuma abin da suka kira rashin da’a a harkokin gwamnati, suna bikin tunawa da matakan da Shugaba kasar Qais Sa’id ya dauka a ranar 25 ga Yulin shekara ta 2021.
Masu zanga-zangar sun taru a dandalin Republic Square kafin su yi tattaki zuwa gidan wasan kwaikwayo na Municipal, suna daga tutar Tunisiya tare da daga kwalaye da ke sukar yanayin siyasar da ake ciki a yanzu. Suna rera taken adawa da Shugaban kasar Qais Sa’id—kamar cewa: “Mutane suna son rusa gwamnati”—a tsakiyar wani gagarumin tsaro da ke kewaye da zanga-zangar, tare da sanya ‘yan sandan kwantar da tarzoma a manyan hanyoyin shiga titin.
An gudanar da zanga-zangar ne don mayar da martani ga kiran da ƙungiyar “Nafas” ta fitar—wani shiri na Tunisiya da aka kafa don kare haƙƙoƙi da ‘yanci da kuma dawo da tsarin dimokuraɗiyya—tare da jam’iyyun adawa daban-daban da manyan ‘yan siyasa, a ƙoƙarin haɗa muryoyin da ke ƙin amincewa da abin da suke ɗauka a matsayin “juyin mulki ga tsarin dimokuraɗiyya.”