Sojojin Iran sun kai hare-hare kan sansanonin Amurka da suke yankin Gabas ta Tsakiya
A mataki na 21 na Operation Thunderbolt, Sojojin Iran sun kai hare-hare kan rundunonin Sojojin Amurka da ke sansanin Doha da ke Kuwait da jiragen sama marasa matuka ciki.
Sojojin sun sanar da cewa, a martanin harin da Amurka ta kai wa yankin Iran, sun kai hari kan rumbunan harsasai da kayan aikin jigilar kayayyaki a cibiyar rundunar sojojin Amurka da ke sansanin Doha, yammacin kasar Kuwait, ta hanyar amfani da adadi mai yawa na jiragen sama marasa matuka ciki.
Sansanin Doha yana daya daga cikin muhimman sansanonin sojojin Amurka da ke yammacin Kuwait kuma cibiyar tallafi ga sojojin Amurka da ke Yammacin Asiya. Tana dauke da adadi mai yawa na kayan aikin sojojin Amurka da ma’aikata, baya ga sojojin ruwa da na sama.
Sojojin sun tabbatar da cewa Sojojin Iran, tare da hadin kansu mai tsarki, sun shirya tsaf don tunkarar duk wani sabon makirci ko tsokana na abokan gaba.
Sojojin Iran sun kuma kai hari kan cibiyoyin gidaje da jin dadin sojojin Amurka da kuma wurin ajiye harsasai a sansanin Azraq da ke Jordan. Jiragen sama marasa matuki na Arash na rundunar Jamhuriyar Musulunci ta Iran sun kai hari kan manyan rumbunan kayan aiki da kuma wani babban wurin ajiye jiragen sama na sojojin Amurka da ke sansanin jiragen sama na Sheikh Isa da ke Bahrain.