Ministan Harkokin Wajen Iran ya tattauna da takwaransa na Faransa kan batutuwan da suka shafi kasashensu da kuma yanki
Ministan Harkokin Wajen Iran Abbas Araqchi da takwaransa na Faransa Jean-Noël Barrot sun yi wata tattaunawa ta wayar tarho, inda suka yi musayar ra’ayoyi kan sabbin ci gaban da aka samu a bangarorin kasashen biyu, yankuna, da kuma na duniya.
A tattaunawar, Araqchi ya bayyana rashin amincewarsa da ayyukan da ba a saba gani ba da jami’an diflomasiyya biyu na Faransa a Tehran suka aikata, yana mai ganin ba za a amince da su ba. Ya jaddada cewa bin dokokin kasa mai masaukin baki da kuma girmama ka’idoji da sharuddanta na diflomasiyya su ne muhimman bukatu na ci gaba da gudanar da ayyukan jakadancin kasashen waje.
Ministan ya yi kira ga gwamnatin Faransa da ta hana sake afkuwar irin wadannan ayyuka kuma ta dauki matakan da suka dace a wannan fanni.
Ministan Harkokin Wajen Iran ya kuma bayyana cewa rufe mashigar ruwan Hormuz ya zo ne sakamakon karya alkawuran da Amurka ta dauka a karkashin Yarjejeniyar Fahimtar juna da aka sanya wa hannu a Islamabad da kuma matakan da take dauka na kara sabawa ka’idoji. Ya jaddada cewa alhakin wannan lamari yana kan bangaren da ya kawo cikas ga hanyar diflomasiyya da kwanciyar hankali ta yankin ta hanyar karya yarjejeniyoyin da kuma ci gaba da bin hanyar da ba ta dace ba.