Ministan Mai da Iskar Gas na Aljeriya, Mohamed Arkab, ya fara ziyarar aiki ta kwanaki biyu a Nijar, wadda ta fara a ranar 21 ga watan da muke ciki.
A cewar wata sanarwa, ziyarar ta mayar da hankali ne kan duba ayyukan hadin gwiwa tsakanin kasashen biyu a fannin makamashi, musamman aikin bututun iskar gas na Trans-Sahara, wato TSGP.
Ziyarar na zuwa ne a daidai lokacin da dangantakar Aljeriya da Nijar ke kara karfi, musamman a fannin mai da iskar gas. A yayin ziyarar, Mohamed Arkab zai duba yadda ayyukan hadin gwiwar kasashen biyu ke tafiya, tare da mai da hankali kan ci gaban aikin TSGP.
Daga cikin abubuwan da za a duba akwai manyan ayyukan gyaran da ake gudanarwa a matatar man Zinder da ke Nijar, da kuma ci gaban aikin bututun iskar gas na Trans-Sahara.