Hukumar Kula da ‘Yan Gudun Hijira ta Duniya (IOM) ta sanar da cewa mutane 1,205 sun rasa matsugunansu a Sudan a garuruwan da suka hada da Bara da Umm Ruwaba a Jihar Kordofan ta Arewa, yayin da wasu 360 suka rasa matsugunansu daga Al-Abbasiya da Delami a Kudancin Kordofan saboda tabarbarewar rashin tsaro.

A cikin wata sanarwa da ta fitar a ranar Lahadi, IOM ta nuna cewa kungiyoyinta da ke aiki a karkashin shirin Bin Diddigin ‘Yan Gudun Hijira sun kiyasta cewa, daga cikin wadanda suka rasa matsugunansu a Arewacin Kordofan, 580 sun tsere daga Bara kuma 625 sun bar Umm Ruwaba.

Hukumar ta kara da cewa mutanen da suka rasa matsugunansu sun zauna a wurare daban-daban a Arewacin Kordofan da kuma wasu garuruwa da dama a Jihar White Nile, a kudancin Sudan.

Matsalar ‘yan gudun hijira ta baya-bayan nan ta biyo bayan jerin hare-haren da aka kai a Arewacin Kordofan, inda mutane 36,625 suka rasa matsugunansu tsakanin 26 da 31 ga Oktoba, a cewar kungiyar.

A wata sanarwa daban, IOM ta bayyana cewa mutane 360 ​​sun rasa matsugunansu a cikin Jihar Kordofan ta Kudu, ciki har da 180 daga Al-Abbasiya da 180 daga Delami, wadanda suka koma wasu yankuna a cikin jihar da kuma Tandalti a Jihar White Nile.

A ranar 26 ga Oktoba, rundunar RSF ta kwace iko da garin Al Fasher da ke Jihar Darfur ta Arewa kuma ta yi kisan gilla ga fararen hula, a cewar ƙungiyoyin cikin gida da na ƙasashen waje.

A ranar Laraba, shugaban rundunar RSF, Mohamed Hamdan Dagalo, wanda aka fi sani da “Hemetti,” ya amince cewa sojojinsa a Al Fasher sun “keta haddi”, yana mai cewa an kafa kwamitocin bincike.