Kafafen watsa labarun HKI Sun ambaci cewa, an kashe sojoji 6 da kuma jikkata wasu 50 a kusa da “Galilot” dake Arewacin  Tel Aviv, 10 daga cikinsu suna cikin hatsari.

An kashe sojojin  ne ta hanyar take su da mota da aka yi,kuma tuni wanda ya kai harin ya yi shahada.

Maharin da yake tuka babbar mota ya tunkuyi tashar da motocin safa-safa suke tsayawa a kusa da “Giliot” a Arewacin Tel Aviv inda sojoji suke tsayawa.

Kungiyar Agaji ta “David Star” ta bayyana cewa tana kokarin yi wa gwamman sojojin da su ka jikkata taimakon gaggawa.

Su kuwa kafafen watsa labarun HKI sun ce da dama daga cikin wadanda su ka jikkata an yanke kaunar cewa za su rayu. Bugu da kari da akwai wasu sojojin su 15 wadanda suka makale a karkashin babbar motar da ta take su,ana kokarin fito da su.

Yankin da lamarin ya faru, na musamman ne a wurin sojojin  mamayar.