Kamfanin dillancin “Reuters” ya nakalto cewa ayau Juma’a ne kasashen uku na Pakistan, Turkiya da Saudiyya za su rattaba hannu akan yarjejeniyar tsaro a tsakaninsu a birnin Jidda na kasar Saudiyya.
Kamfanin dillancin labarun na ‘reuters’ ya nakalto majiyar kasashen yankin suna tabbatar da cewa ayau juma’a ne za a rattaba akan yarjejeniyar tsaron.
Shi kuwa kamfanin dillancin labarun ” AFP” ya ce; shugabannin gwamnatocin kasashen uku ne za su halarci rattaba hannun da su ne; Muhammad Bin Salman na Saudiyya, Rajab Tayyib Urdugan na Turkiya sai kuma Shahbaz Sharif na Pakistan.
Majiyar ta kuma kara da cewa; kasashen sun dade suna tattauna wannan batu, sai dai sauye-sauyen siyasa da suke faruwa a cikin wannan ne su ka sa aka karato da rattaba hannu a kusa.
Tun a jiya Alhamis ne dai Fira ministan kasar Pakitsan sharif da babban hafsan hafsoshin sojan kasar Asim Munir su ka isa Saudiyya, yayin da ake sa ran cewa a yau Juma’a ne, Shugaban kasar Turkiya zai isa.
Dama dai kasashen Saudiyya da Pakistan suna da yarjejeniyar tsaro a tsakaninsu wacce aka sanar da ita a 2025.