A rana ta 398 da hare-haren haramtacciyar kasar Isra’ila kan Zirin Gaza, sojojin mamaya suna ci gaba da kai hare-hare kan yankuna daban-daban na Zirin Gaza, lamarin da ya yi sanadin shahadan da dama da jikkatan Falasdinawa masu yawa, kuma sojojin mamayar sun kara tsananta kai hare-haren wuce gona da iri kan garuruwan da suke arewacin gabar yammacin kogin Jordan, musamman Jenin, Tubas da Tulkaram, kamar yadda suka afka wa ƙauyen Tabqa da ke kudancin Khalil.
Wakilin gidan talabijin na Aljazeera ya watsa rahoton cewa: Sojojin mamayar Isra’ila sun yi luguden wuta ta hanyar jirgin sama kan tsakiya da gabashin birnin Rafah da ke kudancin Zirin Gaza, yayin da suka kai wani hari na daban kan yankin kudu maso gabashin birnin Khan Yunus.
A bangaren Lebanon kuwa, kungiyar Hizbullah ta kaddamar da hare-haren makamai masu linzami da dama kan Safed da matsugunan yahudawa ‘yan kaka gida a arewacin Isra’ila, sannan ta kuma kai hari kan wani sansanin soja mai muhimmanci da ke kusa da filin jirgin saman Ben Gurion a kudancin Tel Aviv.