An ji tashin karar bom a kan titin Ben Yahuda a tsakiyar birnin TelAviv kusa da unguwar da ake da ofisoshin jakadancin kasashen waje a safiyar yau Jumma’a.

Tashar talabijin ta Almayadeen ta kasar Lebanon ta nakalto Jaridar ‘Yadi’uut Ahranuut ta HKI na cewa an ji karar tashin karar bom bayan da wani jirgin yaki wanda ake sarrafashi daga nesa ya burma kan wani gini a kan titin Bin Yahuda a tsakiyar Tel Aviv, kuma wasu hotunan badiyo da aka yada sun nuna burbushin jirgin yakin.

Sannan tashar talabijin ta 13 ta HKI ta bada labarin cewa harin na titin Ben Yahuda ya jiwa wasu yahudawa rauni, amma kuma har yanzun ba’a san daga ina ne jirgin ya taso ba.

Wasu sun bayyana cewa jirgin yakin ya fito ne daga bangaren tekun Medeterenia. Kuma har yanzun ba wanda ya dau alhakin kai harin.

Labarin ya bayyana cewa wadanda suka ji rauni kadan ne, kuma an kaisu asbiti mafi kusa da wurin don jinyarsu.

Amma wasu kafafen yada labarai sun bayyana cewa harin ya haddasa barna a ofishin jakadancin Amurka dake birnin Tel Aviv.