Shugaban kasar Iran Masoud Pezeshkian zai ziyarci makwabciyar kasar Iraki a wata ziyarar da zata kasance karo na farko a kasar tun bayan hawansa karagar mulki a watan Yuli.

Shugaba Pezeshkian wanda zai jagorantar wata babbar tawaga zai tashi zuwa Bagadaza ranar Laraba don tattaunawa da manyan jami’an Irakin.

Ziyarar ta shugaban na Iran za ta zo ne bisa gayyatar firaministan Iraki Mohammed Shi’a al-Sudani, kamar yadda jakadan Iran a Bagadaza Mohammad Kazem Al-e Sadeq ya bayyana a wata hira da IRNA.

Ya kara da cewa, kasashen biyu za su rattaba hannu kan yarjejeniyoyin hadin gwiwa da kuma harkokin tsaro.

Ya kara da cewa, an sanya hannu kan yarjejeniyoyin ne a lokacin da shugaban kasar Iran Mirigayi Ibrahim Raeisi ya shirya kai wata ziyara kasar Iraki.

Jakadan na Iran a Iraki, ya yi ishara da cewa ziyarar ta Pezeshkian a Bagadaza za ta kara fadada alaka ta siyasa, tattalin arziki da al’adu tsakanin kasashen biyu.

A cikin watan Maris na 2023, ne Iran da Iraki suka rattaba hannu kan yarjejeniyar tsaro a Baghdad wanda ya kunshi hada kai wajen kare kan iyaka.