​Rauhani: Dole Ne Biden Ya Janye Takunkumai Kan Iran Kafin Duk Wani Batu Kan Yarjejeniyar Nukiliya

Shugaban kasar Iran Dr. Hassan Rauhani ya bayyana cewa, dole ne gwamnatin Joe Biden ta janye dukkanin takunkuman da Amurka ta kakaba wa Iran, kafin Iran ta koma yin aiki da bangarorin yarjejeniyar nukiliya da ta jingine.

Shugaba Rauhani ya bayyana haka ne a wata zantawa da ta gudana tsakaninsa da shugaban kasar Switzerland Guy Parmelin a daren jiya, inda ya jaddada cewa Iran tana kan bakanta, na cewa dole ne dukkanin bangarorin da suke cikin yarjejeniyar nukiliya da suka rattaba hannu a kanta, su yi aiki da ita lokaci guda.

Ya ce siyasar matsin lamba da kakaba takunkumi a kan Iran da tsohuwar gwamnatin Amurka karkashin shugabancin Donald Trump ta dauka, ba ta yi nasara ba, domin hakan bai iya tilasta Iran din ta ja da baya daga irin matakan da ta dauka ba.

Ya ce kasarsa za ta koma yin aiki da yarjeneiyar bayan jingine yin aiki da wasu bangarorinta, da zaran Amurka ta janye takunkuman da ta kakaba mata.

Shi ma a nasa bangaren shugaban kasar ta Switzerland Guy Parmelin ya bayyana cewa, wajibi ne a kan dukkanin bangarori su girmama abin da ke cikin yarjejeniyar, ta hanyar yin aiki da abin da ke cikinta, kamar yadda ya sha alwashin cewa zai tattara kudaden Iran da aka rike a wasu kasashen duniya, domin mika su ga kasar ta Iran ta hanyoyin da suka dace.

015