Iran:Manzon MDD Kan Rikicin Yemen Ya Gana Da Babban Mai Bawa Ministan Harkokin Wajen Iran Shawara

2021-02-08 09:01:04
Iran:Manzon MDD Kan Rikicin Yemen Ya Gana Da Babban Mai Bawa Ministan Harkokin Wajen Iran Shawara

Babban mai bawa ministan harkokin wajen kasar Iran shawara kan lamuran kasa da kasa Asgar Khaji ya gana da manzon MDD na musamman a kasar Yemen.

Kamfanin dillancin labaran IRNA na kasar Iran ya bayyana cewa jami’an biyu sun tattauna hanyoyin da za’a bi don kawo karshen yaki a kasar Yemen da kuma dawo da zaman lafiya mai dorewa a kasar.

Asgar Khaji, a nashi bangaren ya bukaci a gaggauta dage takunkuman zaluncin da aka dorawa kasar ta Yemen, sannan a gaggauta kaiwa mutanen kasar kayakin agaji wadanda suka hada da abinci da magunguna.

Khaji ya ce Jumhuriyar Musulunci ta Iran a shirye take ta taimaka a wannan bangaren, banda haka Khaji ya bayyana cewa za’a kawo karshen yaki da kuma cikekken zaman lafiya a kasar Yemen ne ta tattaunawa tsakanin dukkan yan siyasar kasar a tsakaninsu ba tare da shigar kasashen waje ba.

Comments(0)
Success!
Error! Error occured!