Wasu mata Falasdinawa uku da wani yaro daya sun yi shahada sakamakon harin bam da yahudawan sahayoniyya suka kai a Gaza
Majiyoyin cikin gida a Falasdinu sun watsa rahoton cewa: Wasu mata guda uku da wani karamin yaro sun yi shahada sakamakon luguden bama-bamai da jirgin saman yakin sojin haramtacciyar kasar Isra’ila ya yi kan wani gida na iyalan Al-Bakri da ke yammacin birnin Gaza.
Sannan wasu jiragen saman yakin sojin haramtacciyar kasar Isra’ila sun kaddamar da hare-hare kan yankin kudu maso gabashin unguwar Al-Zaytoun dake gabashin birnin Gaza, da kuma wani farmaki a kofar shiga sansanin Bureij da ke tsakiyar zirin Gaza.
Kamar yadda sojojin mamayar na yahudawan sahayuniyya suke ci gaba da aikata muggan laifukan kisan kiyashi a Zirin Gaza, a rana ta 252 a jere, ta hanyar kai hare-hare da dama ta sama da kuma harba makaman roka, a yayin da suke aiwatar da kisan kiyashi kan fararen hula, a daidai lokacin da ake cikin wani mummunan yanayi na jin kai sakamakon kawanya da suka yi wa yankin kuma yawan ‘yan gudun hijirar sun kai sama da kashi 95% na al’ummar Falasdinu.