Bangarori a Iran na ci gaba da tir da Allah da kungiyar tarrayar turai kan matakin ta na dauka a baya bayan nan na ayyana Dakarun kare Juyin Juya halin Musulinci na kasar a jerin kungiyar ta’addanci.

Na baya baya nan shi ne matakin da dubban malamman Jami’o’I na kasar suka dauka na yin tir da kungiyar ta EU.

Fiye da malaman jami’o’i 14,000 na Iran ne suka yi Allah wadai da sanya IRGC a matsayin kungiyar ‘yan ta’adda da Tarayyar Turai ta yi, suna bayyana matakin a matsayin haramtacce.

A cikin wata sanarwa, malaman su 14,237 daga jami’o’i a fadin Iran sun bayyana cewa wannan mataki ya biyo bayan gazawar da kasashen yamma suka yi wajen kawo cikas ga kokarin da suke yi na wargaza Iran.

A ranar Alhamis da ta gabata, ne ministocin harkokin waje na EU suka sanar da shawararsu ta sanya IRGC a cikin jerin kungiyoyin ta’addanci tsakanin kasashen kungiyar mai membobi 27.

Farfesoshin sun ce wannan matakin wani mataki ne na siyasa da na shari’a da aka yi niyya don halatta matsin lamba da kuma yiwuwar daukar matakin soja a kan Iran.

Wadanda suka sanya hannu kan yarjejeniyar sun bayyana cewa tsaron Turai a halin yanzu yana da alaƙa da ayyukan sojojin Iran, ciki har da IRGC da kwamandoji kamar Janar Qassem Soleimani, wanda ya taka muhimmiyar rawa wajen kayar Daesh.