Ma’aikatar lafiya a Gaza ta ce akalla mutane 38,584 ne suka mutu a yakin da Isra’ila ta yi kan yankin da aka yi wa kawanya.
Adadin wadanda suka mutun ya ƙunshi mutuwar mutum 141 a cikin sa’o’i 24, in ji sanarwar ma’aikatar, ta kuma kara da cewa mutum 88,881 ne suka jikkata a Gaza tun bayan fara yakin.
Jami’an bayar da agaji na farar hula a Gaza sun zaƙulo gawawwaki 21 na Falasɗinawa daga cikin ɓarguzai a ranar Lahadi bayan wani hari da Isra’ila ta kai a Zirin Gaza.
Wata majiya daga bangaren kiwon lafiya ta bayyana cewa an gano gawar mutum shida sakamakon harin da Isra’ila ta kai a birnin Rafah inda aka kai su asibitin Khan Younis.
Haka kuma an ƙara zaƙulo wasu gawawwakin uku daga cikin ɓaraguzai a yammacin Gaza, kamar yadda Hukumar Kare Fararen Hula ta Gaza ta bayyana a wata sanarwa.
Jami’an sun ƙara gano wasu gawawwakin goma a unguwar Tel al-Hawa da ke kudu maso yammacin Gaza.
Sai kuma mazauna sansanin gudun hijira na Nuseirat sun gano gawawwakin mutum biyu a tsakiyar Zirin Gaza, kamar yadda shaidu suka bayyana.