Jagoran  kungiyar Ansar Allah ta kasar Yemen Sayyed Abdul-Malik al-Houthi ya fadi a jiya Alhamis cewa, jiragen ruwan yaki na Amurka, na taimaka  ma Isra’ila wajen kaddamar da munanan hare-hare kan al’ummar yankin zirin Gaza

Sayyed Al-Houthi ya jaddada cewa, haifar yanayi da zai saka mutane cikin yunwa da gangan ,na daya daga cikin ayyukan  kisan kare dangi da dakarun haramtacciyar kasar Isra’ila ke amfani da su, a yayin da ya kuma yi nuni da yadda aka lalata sashen kula da lafiya na Gaza gaba daya, yana mai bayyana mummunan tasirin da hakan yake da shi ga al’ummar da aka yi wa kawanya.

Haka nan kuma ya yi karin haske kan mumunan abubuwan da fursunoni da wadanda aka sace a gidajen yarin Isra’ila ke fuskanta. Ya ce an yi wa wadannan mutane yunwa tare da yi musu allura da wasu abubuwa masu cutarwa, wadanda ba a san ko su wanene ba, lamarin da ya ta’azzara musu wahala.

Ya kuma yi Allah wadai da sojojin mamaya na Isra’ila saboda rashin mutunta hurumin Musulunci. A cewar al-Houthi, a baya-bayan nan ne sojojin Isra’ila suka gudanar da wani liyafa da liyafa a wani masallaci da ke Rafah, lamarin da ya bayyana a matsayin izgili ga Musulunci.