​Najeriya: Adadin Ma’aikatan Kiwon Lafiya Da Suke Kamuwa Da Corona Yana Karuwa

A cikin wani bayani da hukumar dakile yaduwar cututtuka ta Najeriya ta fitar, ta bayyana cewa akalla ma’aikatan kiwon lafiya 75 suka kamu da cutar Korona a makon jiya a fadin Najeriya.

A lokacin da yake zantawa da manema labarai jiya a birnin Abuja fadar mulkin tarayyar Najeriya, shugaban hukumar NCDC ya bayyana cewa, ana samun kamruwar adadin ma’aikatan kiwon lafiya da suke kamuwa da cutar corona a Najeriya, wanda kuma hakan abin damu ne matuka.

Ya ce gwamnati tana kokari domin ganin cewa ma’aikatan kiwon lafiya sun samu kariyar da ta dace, musamman wadanda suke kula da masu dauke da cutar corona, amma babbar matsalar ita ce babu wadatattun kayan aiki na kariya.

Shugaban hukumar ta NCDC ya ce daga yanzu suna da shirin fara yin amfani da tsarin gwaji na nan take wato ‘Rapid Diagnostic Test Kits wajen yi wa mutane gwajin cutar a asibitoci, wanda ya ce hakan zai taimaka matuka wajen kare ma’aikatan kiwon lafiya.

Ya ce da farko za a fara yin amfani da na’urar yin wannan gwaji ne a Abuja, inda za a fara horas da malaman kiwon lafiya kan yin aiki da ita, daga bisani kuma za a rarraba ta zuwa sauran cibiyoyin kiwon lafiya na kasa.

015