​Yemen: Kawancen Amurka-Saudiyya Na Aikata Ta’addanci Na Haƙiƙa

2021-01-25 17:32:06
​Yemen: Kawancen Amurka-Saudiyya Na Aikata Ta’addanci Na Haƙiƙa

Al’ummar ƙasar Yemen sun bayyana cewar ta’addanci na haƙiƙa shi ne abin da haɗakar Amurka-Saudiyya suke aikatawa a kan al’ummar ƙasar Yemen na killace su da hana su dukkanin abubuwan da suke buƙata wajen gudanar da rayuwarsu.

Wannan kalami yana cikin sanarwar bayan taron gangamin da aka gudanar ne a yau ɗin nan a birnin Sana’ na ƙasar Yemen ɗin don amsa kiran da wasu ƙungiyoyi suka yi na gudanar da wannan gangami a masayin ‘Ranar Duniya Don Goyon Bayan Al’ummar Yemen’ inda yayin da suke mayar da martani ga matakin da Amurka ta ɗauka na sanya ƙungiyar Ansarullah ta Yemen ɗin cikin ƙungiyoyin ta’addanci suka bayyana cewar: ta’addanci na haƙiƙa shi ne abin da haɗakar Amurka-Saudiyya suke aikatawa a kan al’ummar ƙasar Yemen.

Masu gangamin sun ci gaba da cewa: Amurka ita ce take da alhakin dukkanin hare-haren da Saudiyya da ƙawayenta suke kai wa ƙasar ta Yemen da kuma ci gaba da killace al’ummarta don kuwa ita ce take ba su goyon baya da kum dukkanin wani taimako da suke buƙata.

Masu gangamin sun ce sanya ƙungiyar Ansarullah a cikin ƙungiyoyin ta’addanci na duniya da Amurka ta yi wani lamari ne da ke nuni da gazawa da kuma shan kashin Amurkan a gaban al’ummar Yemen.

A kwanakin baya ne dai ƙungiyoyi da cibiyoyi daban-daban suka yi kiran da a gudanar da gangami a yau ranar 25 ga watan Janairu a matsayin ‘Ranar Duniya Don Goyon Bayan Al’ummar Yemen’ don nuna goyon baya ga al’ummar Yemen ɗin da kuma yin Allah wadai da halin da aka sanya su ciki na yunwa da rashi da tsanani sakamakon yaƙin wuce gona da iri da Saudiyya da ƙawayenta bisa goyon bayan Amurka suka ƙaddamar kan ƙasar sama da shekaru biyar ɗin da suka gabata.


015

Comments(0)
Success!
Error! Error occured!