Wani bafalasdine ya yi shahada a sansanin ‘yan hijira dake “Ayn-Shams” sanadiyyar hare-hare da HKi ta kai a yankin.
Majiyar Falasdinawa ta ambaci cewa an kai gawar shahidin a asibitin Sabit Sabit dake Tul-Karam, da kuma wani da ya jikkata a cikin wannan sansanin.
Wasu shafukan internet na watsa labaru na Falasdinawa sun nuna yadda wata motar buldoza ta sojojin HKI suke lalata gidaje da kuma muhimman cibiyoyi a kusa da sansanin ‘yan hijira dake gabashin Tul-Karam.
Bugu da kari sojojin mamayar HKI sun kutsa cikin garin Daura, dake kudancin al-khalil a yammacin kogin Jordan, suna bude wuta akan mai uwa da wabi da kuma jefa hayaki mai sa hawaye mai tsanani akan gidajen mutanen garin.
A cikin gundumar Ramallah ma sojojin mamayar sun kutsa cikin garin Baituniya, sai kuma Bira dake yammacin Kogin Jordan.
Kamfanin dillancin labarun Falasdinawa na “WAFA” ya ambaci cewa an jikkata wani mutum daya a garin Hablah dake kudancin Qalqiliyah.
Tashar Talbijin din Falasdinu ta nuna yadda sojojin na mamaya su ka yi kutse a cikin garin suna masu bude wuta.