Masu bayar da agajin gaggawa na farar hula sun ce harin da Isra’ila ta kai kan wata makarantar boko ya kashe akalla mutum 12, yayin da sojojin Isra’ila suka yi ikirarin kai hari a cibiyar kwamandojin Hamas.

Mai magana da yawun hukumar Mahmud Bassal ya shaida wa kamfanin dillancin labaran Faransa na AFP cewa, “ma’aikatanmu sun kwaso shahidai 12 daga Makarantar Mustafa Hafiz, da Isra’ila ta kai musu hari a yammacin birnin Gaza.

A baya dai Bassal ya bayar da adadin mutuwar mutum bakwai da jikkata wasu 15 a yajin aikin da ya ce ya afka wa hawa na biyu na ginin makarantar.

Rundunar sojojin Isra’ila ta ce ta gano gawawwaki shida na mutanen da Hamas ta yi garkuwa da su a harin ba-zata da ta kai ranar 7 ga watan Oktoba.

Wata sanarwa da rundunar ta fitar ranar Talata ta ce ta gano gawawwakin ne a wani samame da ta kai da tsakar dare a kudancin Gaza.

Rundunar sojojin Isra’ila ba ta faɗi yadda aka kashe mutanen ba. Amma sau da dama Hamas ta bayyana cewa Isra’ila ta kashe wasu daga cikin waɗanda ta yi garkuwa da su a luguden wutar ta take yi babu ƙaƙƙautawa a yankin, wanda ya mayar da kusan ɗaukacin yankin tamkar kufayi.

Majalisar Dinkin Duniya ta ce Isra’ila ta kashe Falasɗinawa fiye da 40,000 sakamakon hare-haren da take kai wa Gaza.

“Galibin mutanen da ta kashe mata da yara ne. Wannan babban bala’in ya faru ne sakamakon gazawar Rundunar Tsaron Isra’ila wajen kiyaye dokokin yaƙi,” a cewar Babban Jami’i na MDD kan Kare Hakkin Dan’adam Volker Türk a wata sanarwa da ya fitar a baya bayan nan.