Jagoran Juyin Juya Halin Musulunci na Iran, Ayatollah Seyyed Mojtaba Khamenei, ya yabi marigayi Ayatollah Hossein Vahid Khorasani, inda ya bayyana shi a matsayin daya daga cikin manyan ginshikan koyar da ilimin shari’ar Musulunci a makarantu.
A cikin sakon ta’aziyya da aka fitar bayan rasuwar babban malamin, Jagoran ya siffanta Ayatollah Vahid Khorasani a matsayin babban malami wanda darussansa na yau da kullum suka kasance daga cikin makarantun addini a cikin shekarun da suka gabata.
Ayatollah Khamenei ya bayyana cewa, wadannan darussa sun kasance sakamakon zurfaffen bincike da marigayin ya gudanar, tare da cikakkiyar fahimta da kuma girmamawa ga ra’ayoyin manyan malamai daga makarantar ilimi ta Najaf.
Ya kara da cewa, yadda marigayin yake gabatar da darussa cikin fasaha, tsari, da kuma kwarin gwiwa, ya sa kowane zama ya zama mai matukar amfani ga daliban ilimin addini.
Jagoran ya ce, da yawa daga cikin malamai da masana da ke koyarwa a yau a makarantar ilimi ta Qom, da ma sauran cibiyoyin addini a fadin kasar, suna alfahari da ambaton cewa sun halarci darussansa a lokacin da suke neman ilimi.
Ya kuma yi nuni da irin tsantsar kauna da girmamawa da marigayin yake nunawa ga iyalan gidan Manzon Allah (Ahlulbayt).
Babban Ayatollah Hossein Vahid Khorasani ya rasu a ranar Talata yana da shekaru 105 a duniya.