Kasar Iran da kuma wasu kasashe 11 sun fitar da bayanin hadin giuwa a taron Kwamiti na Farko na babban zauren MDD karo na 81, inda suke kira da a kawo karshen kai hare hare a kan cibiyoyin Nukliya a duniya wadanda suke karkashin kula na hukumar IAEA mai kula da al-amuran nukliya ta duniya.
Tashar talabijan ta Presstv a nan Tehran ya nakalto kasashen suna wannan bayanin a jiya Jumma’a , kuma sun hada da JMI da kasashen da suke goyon bayanta, wadanda suka hada da – Russia, China, Belarus, Burkina Faso, Cuba, Eritrea, Nicaragua, Niger, Pakistan, Tajikistan, da kuma Zimbabwe.
Sun bukaci a bawa dukkan kasashen duniya damar amfani da fasahar Nukliya ta zaman lafiya, a matsayin hakkin ko wace kasa a duniya yin haka.
Kasashen sun bayyana cewa, kai hare hare kan cibiyoyin Nukliya ta zaman lafiya a matsayin sabawa dokokin kasa da kasa da kuma tsare tsaren MDD da kuma ta hukumar IAEA.
Sun ce ba kamata a kaiwa cibiyar makamashin nukliya a ko ina yake, a duniya, kuma yin shiru kan wannan batun idan ya faru bai dace ba. Don barazana ce kan cibiyoyin nukliya a duniya.
Daga karshe sun bukaci kasashen duniya gaba daya su hadu gaba daya su kuma nuna Rashin amincewarsu ga hakan, su kuma goyi bayan amfani da makamashin nukliya ta zaman lafiya.