Kungiyar HRW Ta Zargi Sojojin Habasha Da Farmawa Fararen Hula

2021-02-11 20:50:13
Kungiyar HRW Ta Zargi Sojojin Habasha Da Farmawa Fararen Hula

Kungiyar kare hakkin dan adam ta kasa da kasa (Human Rights Watch) ta zargi gwamnatin Habasha da kai farmaki kan fararen hula da ababe masu fashewa.

A rahoton data fitar kungiyar ta ce sojojin na Habasha, sun jefa abubuwan fashewa a birane daban daban lokacin rikicin yankin Tigray, wanda kuma hakan a cewar HRW, sun saba wa dokokin yaki.

Rahoton ya ce an yi amfani da abubuwan fashewa a gidaje da makarantu da kasuwanni a hare-haren sojojin a yankin na Tigray, lamarin da ya yi sanadin mutuwar fararen hula 83 ciki har da yara kanana.

Ko baya ga hakan a cewar rahoton na HRW akwai mutane sama da dari uku da suka samu raunuka.

Babu dai wani martani daga gwamnatin ta Habasha kawo yanzu kan wannan rahoton, saidai a kwanakin baya fira ministan Habashar, Abiy Ahmed ya kare sojojin da zargin kashe fararen hula a yankin na Tigray.

024

Comments(0)
Success!
Error! Error occured!