Sojojin Uganda Sun Ce Sun Kashe Mayaƙan Al-Shabab 189 A Ƙasar Somaliya

2021-01-24 09:24:40
Sojojin Uganda Sun Ce Sun Kashe Mayaƙan Al-Shabab 189 A Ƙasar Somaliya

Sojojin Uganda da suke aiki da cikin rundunar tabbatar da zaman lafiya na ƙungiyar Tarayyar Afirka a ƙasar Somaliya sun ce sun hallaka mayaƙan ƙungiyar ta’addancin nan ta Al-Shabab a wani harin da suka kai wasu daga cikin sansanoninsu.

A cikin wata sanarwa da ta fitar, rundunar sojan Ugandan ta ce a wani harin da sojojinta suka kai wata maɓuyar mayaƙan na Al-Shabab a ƙauyukann Sigagle, Adimole da Kayitov da suke kimanin kilomita 100 kudu maso yammacin birnin Mogadishu babban birnin ƙasar Somaliyan, sojojin sun sami nasarar hallaka ‘yan ƙungiyar da ke da alaƙa da ƙungiyar ta’addancin nan ta Al-Qaeda su 189 bayan ga lalata makamai da sauran kayayyakin aikin da ‘yan ta’addan suke amfani da su.

Kakakin sojin Ugandan Laftanar Kanar Deo Akiiki ya ce an yi amfani da sojojin ƙasa da kuma kai hare-hare ta sama yayin waɗannan hare-hare da aka kai wa ‘yan ta’addan, yana mai cewa wannan shi ne adadi mafi yawa na ‘yan ƙungiyar Al-Shaabab ɗin da aka kashe a rana guda.

Har ya zuwa yanzu dai ‘yan ƙungiyar ta al-Shabab ba su ce komai ba dangane da wannan ikirari na sojojin Ugandan.

Sama da shekaru 10 kenan sojojin Ugandan suke aiki tare da dakarun tabbatar da zaman lafiya na ƙungiyar Tarayyar Afirka a ƙasar Somaliyan (AMISOM), wanda babban manufar tawagar ita ce taimako da kuma goyon bayan gwamnatin tsakiya ta Somaliya da kuma daƙile ƙoƙarin da ƙungiyar ta’addancin ta Al-Shabab take yi na kifar da gwamnatin.

Cikin ‘yan kwanakin nan dai mayaƙan al-Shabab ɗin sun matsa ƙaimi wajen kai hare-hare kan jami’an tsaro a daidai lokacin da dakarun ƙungiyar Tarayyar Afirka da suke Somaliyan da kuma sojojin ƙasar suke ci gaba da korar ‘yan ta’addan daga tungayensu.

Comments(0)
Success!
Error! Error occured!