Shugaban kasar Iran Masoud Pezeshkian ya ce gwamnatinsa na neman hanyoyin da za a cire takunkumin zalunci da ya sabawa  doka da aka kakaba wa Jamhuriyar Musulunci ta Iran.

Pezeshkian ya bayyana hakan ne a lokacin da yake zantawa da manema labarai a gefen wani taro da aka gudanar a harabar ma’aikatar harkokin wajen kasar don karramawa da kuma gabatar da sabon ministan harkokin wajen kasar.

“Ayyukan da makiya suke yi a kan Iran zalunci ne. Za mu bi alkawuranmu kuma dole ne su tsaya kan alkawuran da suka dauka, ”in ji Pezeshkian.

Ya ce karfafa da bunkasa alaka da makwabta na daya daga cikin abubuwan da gwamnati ta sa gaba.

Pezeshkian ya ce abubuwan da gwamnatinsa ta sa a gaba sun ta’allaka ne da manufofin Jagoran juyin juya halin Musulunci dangane da kulla alaka da gudanar da wasu lamurra da suka shafi kasashen ketare da kuma kiyaye maslahar kasa.

Shi ma ministan harkokin wajen Iran Abbas Araghchi ya yi takaitattun bayanai.

Ya ce: “Mafi mahimmancin abubuwan da ma’aikatarsa ​​ta sa a gaba, su ne bude hanya da kawar da cikas a fagen tattalin arziki, da daukaka da alfaharin kasa a dukkan fannoni, da kuma taimakawa tsaron kasa.”

Kafin lokacin sabon shugaban kasar da sauran mambobin majalisar ministocinsa sun gana da Jagoran juyin juya halin Musulunci Ayatullah Sayyid Ali Khamenei, inda ya bayyana cewa kiyaye hadin kan kasa da kuma sanya al’umma farin ciki da manufofin gwamnati, su ne  hanyoyi mafi dacewa wajen dakile  Takunkumin Amurka da EU.

Ya ce idan har aka samu hadin kai a cikin kasa da kuma al’ummar musulmi, Amurka, Turai da sauran kasashen da suke mara wa zaluncin gwamnatin sahyoniyawan baya wajen kisan kare dangi za su ji kunya.