Makamai masu linzamin ‘yan gwagwarmayar Lebanon sun tarwatsa wani gida a birnin Tel-Aviv tare da raunata yahudawan sahayoniyya

Majiyar ma’aikatar da ke kula da motocin daukar marasa lafiya ta haramtacciyar kasar Isra’ila ta ce: An kai yahudawan sahayoniyya bakwai da suka jikkata zuwa asibitoci bayan da makamai masu linzami suka fado kan garin Al-Tira da ke yankunan da aka mamaye.

A nata bangaren, rundunar sojojin mamayar haramtacciyar kasar Isra’ila ta ce: Da sanyin safiyar ranar Asabar, an yi ta jin kararrakin harbe-harbe a yankuna da dama na yankunan da aka mamaye, bayan harba makamai masu linzami kan yankuna daga kasar Lebanon.

Majiyar sojojin mamayar ta kara da cewa: An kuma gano harba makamai masu linzami guda uku daga kasar Lebanon zuwa arewacin Tel Aviv, inda aka kakkabo daya daga cikinsu.

A nasu bangaren masu fafutuka sun yada faifan bidiyo na ire-iren barna masu yawa da makamai masu linzamin ‘yan gwagwarmayar Lebanon suka yi a wasu gine-ginen birnin na Tel Aviv fadar mulkin haramtacciyar kasar Isra’ila.