Rundunar Izzuddeen Al-Qassam ta kai wani gagarumin farmaki kan sojoji da motocin ‘yan mamaya a birnin Rafah da ke kudancin Zirin Gaza

Rundunar Izzuddeen Al-Qassam bangaren sojin kungiyar Hamas ta sanar da cewa: Mayakanta sun kai wani gagarumin farmaki kan sojojin mamaya da motocinsu a kusa da mahadar Burj Awad a birnin Rafah da ke kudancin Zirin Gaza, inda suka yi nasarar kashe sojojin da jikkata wasu na daban.

Harin na Rundunar Qassam ya hada da harba bindiga daga nesa kan sojojin ‘yan mamaya guda 4, inda ta tabbatar da kashe biyu daga cikinsu, sannan wata tankar yaki kirar Merkava da ta kawo dauki ga sojojin ta kama da wuta sakamakon hari da ‘yan gwagwarmaya suka kai mata da makami mai linzami kirar Yassin 105.

A gefe guda kuma, Jaridar Yedioth Ahronoth ta haramtacciyar kasar Isra’ila ta buga cikakkun bayanai masu ban sha’awa game da yadda sojojin mamayar Isra’ila da suke yaki a cikin Gaza, wanda ake samun da dama daga cikinsu suna kashe kawunansu a gaban ‘yan uwansu sojoji.

Kamar yadda Jaridar ta ce a cikin wani rahoto da ta fitar cewa: A halin da ake ciki akwai dubban sojojin mamaya da suke karkashin kulawar tabin kwakwalluwa lamarin hakan bai faru ba a duk yake-yaken da gwamnatin haramtacciyar kasar Isra’ila ta gudanar a baya.