Dakarun Hizbullah sun sanar da cewa sun dakile duk wani yunkurin ‘yan sahayoniya na yin kutse ta kasa cikin kasar Lebanon.

Sanarwar da dakarun na Hizbullah su ka fitar a jiya Juma’a, sun ce bayan da abokan gaba su ka ci kasa wajen yin kutse ta dukkanin yankuna, sun koma wasu sabbin wuraren daga yamma, suna son shiga yankin “Ra;asu Naqurah” da “Jallul-Alam” da “Labunah” sai dai kuma shi ma sun sha kashi.

Gabanin kokarin yin kutsen, jiragen sama na HKI sun kai munanan hare-hare da kuma wasu hare-haren daga jiragen ruwa. Da su ka fara kokarin yin kutse, sun fuskanci mayar da martani mai tsanani daga mujahidai, lamarin da ya tilasta musu komawa inda su ka fito.

A ranakun Laraba da Alhamis, sojojin mamayar sun yi kokarin yin kutse amma duk sun fuskanci mayar da martani mai tsanani, lamarin da ya tilasa musu komawa da baya.