​Araqchi: Iran Za Ta Tattauna Da Kasashen Yankin Gabas Ta Tsakiya Ne Kawai Kan Sha’anin Yankin

Mataimakin ministan harkokin wajen kasar Iran ya bayyana cewa, kasar za ta tattauna kan batutuwan da suka shafi yankin gabas ta tsakiya ne kawai tare da kasashen yankin.

Mataimakin ministan harkokin wajen kasar Iran Sayyid Abbas Araqchi ya bayyana cewa, Iran a shirye take ta tattauna da dukkanin kasashen yankin gabas ta tsakiya dangae da batutuwa da suka shafi yankin, da kuma yadda za a warware matsalolin da suka addabi al’ummomin yankin.

Araqchi ya ce; Iran ba za ta amince wasu banagrori da ba na yankin ba su shiga cikin irin wannan tattaunawa, domin kuwa matsaloli da dama da ake fama da su a yankin gabas tsakiya an kirkiro su ne daga wajen yankin.

Ya kara da cewa, yanzu haka akwai tattaunawa da take gudana tsakanin wasu kasashen yankin da kuma Iran, kan yadda za a fuskanci lamurra musamman a bangaren tsaron yankin, kan yadda za a gudanar da ayyuka na hadin gwiwa a tsakaninsu.

Iran ta sha nanata cewa kasashen yammacin turai da wasu kasashen larabawan yankin suka dogara da su domin su tabbatar musu da tsaro, hakan ba ita ce mafita ba, babbar mafita ita ce samun hadin kai da fahimtar juna tsakanin dukkanin kasashen yankin, da kuma yin aiki tare a dukkanin bangarori da hakan ya hada har da bangaren tsaro.

015