​Araqchi: Yarjejeniyar Nukiliya Ba Ta Da Amfani Ga Iran Matukar Ba A Dauke Mata Takunkumi Ba

2021-02-13 09:39:18
​Araqchi: Yarjejeniyar Nukiliya Ba Ta Da Amfani Ga Iran Matukar Ba A Dauke Mata Takunkumi Ba

Mataimakin ministan harkokin wajen kasar Iran Sayyid Abbas Araqchi ya bayyana cewa, yarjejeniyar nukiliya da aka cimmawa tsakanin Iran da manyan kasashen duniya ba ta da wani amfani ga kasar ta Iran, matukar ba a janye takunkuman da Amurka ta kakaba mata ba.

A wani bayaninsa ga wasu kafofin yada labarai a yammacin jiya a birnin Tehran, Mataimakin ministan harkokin wajen kasar Iran Sayyid Abbas Araqchi ya jaddada cewa, Iran ba za ta taba komawa yin aiki da wannan yarjejeniya ba, matukar dai Amurka ba ta janye takunkuman da Donald Trump ya kakaba mata ba.

Ya ce, idan gwamnatin Joe Biden tana son Iran ta ci gaba da yin aiki da wannan yarjejeniyar kamar yadda aka rattaba hannu a kanta, to dole ne ta janye wa Iran takunkuman da Trump ya kakaba mata, sannan kuma a ga tasirin hakan a aikace, a lokacin ne Iran za ta koma yin aiki da yarjejeniyar kamar yadda take yi a baya.

A lokacin yakin neman zabe Joe Biden ya sha alwashin komawa cikin yarjejeniyar nukiliya da aka kulla tare da Iran ba tare da wani sharadi ba, amma bayan lashe zabe ya gindaya sharadin cewa, dole ne Iran ta koma yin aiki da yarjejeniyar maimakon matakin jingine yin aiki da wasu bangarorinta da ta dauka.

Iran dai ta ce tana da hakkin daukar irin wannan mataki kamar yadda bangaren na 36 na yarjejeniyar ya ba ta damar yin hakan, matukar wata kasa daga cikin kasashen daga suka rattaba hannu kan wannan yarjejeniya bai yi aiki da ita ba, wanda kuma Amurka baya ga saba wa yarjejeniyar, ta fice ne daga cikinta ma baki daya.

015

Comments(0)
Success!
Error! Error occured!