​Yemen: Sojojin Mamaya Na Saudiyya Sun Fara Janyewa Daga Gundumar Marib

Sojoji gami da dakarun sa-kai na kabilun larabawan Yemen sun tilasta sojojin mamayar Saudiyya a garin Marib da ke yammacin kasar ta Yemen ficewa daga yankin.

Tashar Almasirah ta bayar da rahoton cewa, an ga motoci masu sulke na sojin Saudiyya suna janyewa a jiya daga wasu yankuna da suka kafa tunga a cikin gundumar Marib a yammacin kasar Yemen.

Rahoton ya ce hakan na zuwa sakamakon tsayin dakan da sojoji gami da dakarun sa-kai na kabilun larabawan Yemen suke yi ne wajen fuskantar sojojin mamayar Saudiyya a garin Marib, bayan gumurzu da karan batta na tsawon fiye da shekaru biyu da ake yi a yankin mai matukar muhimmanci.

A cikin makon nan sojojin na Yemen gami da dakarun sa-kai na kabilun larabawan kasar da suka hada da na kungiyar Ansarullah da aka fi sani da Alhuthi, sun kaddamar da wasu hare-haren ramuwar gayya a kan babban filin sauka da tashin jiragen sama na yankin Abha a kudancin Saudiyya, wanda hakan ya jawo asarori a kan kaddarorin da ke wurin.

Baya ga haka kuma a jiya Juma’a sun sake kai wani farmakin da jirage marassa matuki a kan babban filin sauka da tashin jiragen sama na sarki Khalid bin Abdulazizi da ke kusa da birnin Riyad, wanda kuma ficewar sojojin na Saudiyya daga yankin Marib na Yemen, na zuwa ne bayan wadannan hare-hare na dakarun na Yemen.

015