Amurka: Majalisar Dattijai Ta Dakatar Da Marjorie Taylor Daga Wasu Kwamitocin Majalisar

2021-02-06 18:55:02
Amurka: Majalisar Dattijai Ta Dakatar Da Marjorie Taylor Daga Wasu Kwamitocin Majalisar

An kori ‘yar majalisar dattijan Amurka mai tsananin kiyayya da addinin musulunci Marjorie Taylor Green daga wasu kwamitocin majalisar.

Kafofin yada labaran Amurka sun bayar da rahoton cewa, majalisar dattijan Amurka ta kori ‘yar majalisa mai tsananin kiyayya da addinin musulunci Marjorie Taylor Green daga wasu kwamitocin majalisar sakamakon yadda take ta kawo matsaloli da haifar da rashin jituwa a tsakanin ‘yan majalisar.

Wannan 'yar majalisa wadda ta ci zabe 'yan watannin da suka gabata wanda ya ba ta damar zama 'yar majalisar dattijan Amurka, a cikin 'yan makonnin nan tana furta maganganu na neman tayar da zaune tsaye a cikin majalisar.

Daga cikin irin maganganun da take yi kuwa har da ikirarin cewa Donald Trump ne ya ci zabe, an dai murde masa ne kawai aka dora Joe Biden, kamar yadda kuma take nuna goyon bayanta ga tunzura magoya bayansa da Donald Trump ya yi suka kaddamar da farmaki kan majalisa.

Wannan yasa ta samu sabani hatta da su kansu 'yan majalisar dattijan da suka fito daga jam'iyyarta ta Republican, inda da dama daga cikinsu suka mara baya ga shawarar da aka gabatar kan korarta daga cikin kwamitocin majalisar guda biyu da aka sanya ta a matsayin mamba.

Wannan 'yar majalisar dattijan Amurka da ke wakiltar jihar Georgia, ta yi kaurin suna wajen kin addinin musulunci da musulmi, musamman a lokacin mulkin Trump inda masu irin wannan ra'ayi suke samun goyon baya da kariya kai tsaye daga gwamnati.

015


Comments(0)
Success!
Error! Error occured!