​Tarayyar Turai Tana Tattaunawa Da Amurka Domin Dauke Wa Iran Takunkumi

Majiyoyin kungiyar tarayyar turai sun ce jami’an kungiyar suna tattaunawa da Amurka domin dauke wa Iran takunkuman da ta kakaba mata.

Tashar Aljazeera ta bayar da rahoton cewa, wani bayani da ta samu daga ofishin babban jami’i mai kula da harkokin siyasar wajen kungiyar tarayyar, na tabbatar da cewa jami’an kungiyar suna tattaunawa da Amurka domin dauke wa Iran takunkumai.

Rahoton ya ce kungiyar tarayyar turai na kokarin ganin Amurka ta dawo cikin yarjejeniyar nukiliya da aka cimmawa tare da Iran a 2015, yarjejeniyar da tsohon shugaban kasar Amurka Donald Trump ya fitar da kasar ta Amurka a cikin shekara ta 2018, tare da sake mayar wa Iran din da takunkuman da aka dauke mata.

Tun lokacin yakin neman zabe, sabon shugaban kasar Amurka Joe Biden ya yi ta nata cewa, idan ya lashe zabe zai mayar da Amurka cikin wanan yarjejeniya, matukar dai Iran ta ci gaba da yin aiki da ita.

Bayan ficewar Amurka daga yarjejeniyar, da kuma kasa aiwatar da wasu alkawulla da kasashen kungiyar tarayyar turai suka dauka, Iran ta jingine yin aiki da wasu bangarorin yarjejeniyar, tare da bayyana cewa za ta ci gaba da yin aiki da su bisa sharadin cika mata alkawullan da kasashen turai suka dauka.

A halin yanzu dai Iran ta ci gaba da shirinta na tace kashi 20% na sanadarin uranium, wanda kasashen turan ke fargabar cewa Iran za ta iya kera makaman nukiliya da shi.

015