​Rauhani: Yakin Tattalin Arziki Da Amurka Ta Kaddamar Domin Karya Iran Bai Yi Nasara Ba

Shugaba Rauhani na kasar Iran ya bayyana cewa, yakin tattalin arziki da gwamnatin Amurka ta kaddamar a kan kasar Iran bai yi nasara ba.

Shugaba Rauhani ya bayyana hakan ne yau a lokacin da yake halartar taron majalisar ministocin kasar a birnin Tehran, inda ya jaddada cewa babu gudu babu ja da baya dangane da dukkanin matakan da Iran ta dauka na tunkarar takunkuman da Amurka ta kakaba mata.

Ya ce halin yanzu bayan faduwar Donald Trump, Iran ta kara samun tabbaci kan rashin nasarar takunkuman rashin kan gado da gwamnatin ta Trump ta kakaba mata, wanda kuma ya gama ya tafi cikin kwandon shara na tarihi.

Dangane da batun matakan da Iran ta dauka na jingine yin aiki da wasu bangarorin yarjejeniyar nukiliya kuwa, Rauhani ya bayyana cewa Iran din a shirye take ta koma bisa yin aiki da yarjejeniyar, matukar sauran bangarorin su ma sun koma yin aiki da ita kamar yadda aka rattaba hannu.

Haka nan kuma ya kirayi kasashen kungiyar tarayyar turai da su daina bin salon siyasar harshen damo dangane da abin da ya shafi wanann yarjejeniya, matukar dai da gaske suke yi kan neman kubutar da ita daga rushewa.

015