​Mukarraban Biden Sun Yi Watsi Da Saka Kungiyar (Alhuthi) Cikin ‘Yan Ta’adda Da Trump Ya Yi

2021-01-17 11:11:10
​Mukarraban Biden Sun Yi Watsi Da Saka Kungiyar (Alhuthi) Cikin  ‘Yan Ta’adda Da Trump Ya Yi

Wasu daga cikin manyan mukarraban zababben shugaban kasar Amurka mai jiran gado Joe Biden, sun yi kakkausar suka dangane da saka kungiyar Ansarullah (Alhuthi) cikin kungiyoyin ‘yan ta’adda da gwamnatin Trump ta yi.

Tashar RT ta bayar da rahoton cewa, a cikin wani bayani da ya wallafa a shafinsa na twitter, mutumin da ake sa ran zai rike matsayin shugaban majalisar tsaron kasa a Amurka a cikin gwamnatin Joe Biden, Jake Sullivan, ya bayyana cewa saka kungiyar Alhuthi cikin ‘yan ta’adda da Trump ya yi, zai jefa miliyoyin mutane a kasar Yemen cikin hali mafi muni daga wanda suke ciki.

Ya ce bai san dalilin daukar wannan matakia cikin kwanakin karshe na gwamnatin Trump ba, domin hakan ba abu ne da zai taimaka wajen warware matsalar rikicin da ake fama da shi a kasar Yemen ba, illa kara ruruta wutar rikici, da kuma jefa rayuwar miliyoyin mutane cikin mawuyacin hali.

Majalisar dinkin duniya da kungiyar tarayyar turai sun soki gwamnatin Trump dangane da daukar wanann mataki na saka kungiyar Ansarullah ko (Alhuthi) a cikin kungiyoyin ‘yan ta’adda, tare da bayyana hakan da cewa ba daidai ba ne.

Babban jami’in majalisar dinkin duniya kan harkokin agaji ya ce wannan matakin na gwamnatin Trump, zai kawo cikas ga ayyukan kai agaji da dauki ga miliyoyin al’ummar Yemen, kasantuwar kungiyar Ansarullah bangare mai muhimamnci a Yemen da ke kula da bangarori masu yawa da ke cike da miyoyin al’umma a kasar.

015

Comments(0)
Success!
Error! Error occured!