​Isra’ila: Biden Ba Zai Yi Watsi Da Siyasar Trump Wajen Hada Alaka Tsakaninmu Larabawa Ba

2021-01-16 09:08:15
​Isra’ila: Biden Ba Zai Yi Watsi Da Siyasar Trump Wajen Hada Alaka Tsakaninmu Larabawa Ba

Majiyoyin gwamnatin Isra’ila sun ce zababben shugaban Amurka zai ci gaba da bin salon siyasar sanya larabawa su kulla alaka da Isra’ila kamar yadda Trump ya yi.

Bisa ga rahotanni da kafofin yada labaran Isra’ila ke bayarwa, majiyoyin gwamnatin yahudawan Isra’ila sun tabbatar cewa, zababben shugaban Amurka Joe Biden zai ci gaba da bin salon siyasar sanya larabawa su kulla alaka da Isra’ila.

Rahoton ya kara da cewa, Ilyaf Benjamin babban jami’i mai kula da harkokin kasashen yankin gabas ta sakiya a ma’aikatar harkokin wajen Isra’ila ya bayyana cewa, babu batun komawa baya dangane da batun kulla alaka tsakanin Isra’ila da gwamnatocin larabawa.

Ya ce gwamnati mai barin gado a Amurka ta taka gagarumar rawa wajen karkatar da hankulan kasashen larabawa zuwa ga kulla alaka da gwamnatin Isra’ila, haka nan kuma gwamnatin da za ta karbi ragamar mulki za ta ci gaba da bin wannan siyasa.

Ya kara da cewa yanzu haka suna tattaunawa da wasu kasashen arewacin Afirka, da suke shirye su kulla irin wannan alaka da Israila.

Kasashen hadaddiyar daular larabawa da Bahrain da kuma Sudan gami da Morocco, su ne a halin yanzu dai suka sanar da kulla alaka hukumance da gwamnatin yahudawan Isra’ila bisa matsin lambar gwamnatin Trump mai barin gado.

015

Comments(0)
Success!
Error! Error occured!