Mali: Tsohon Firayi Minista Da Ake Zargi Da Yunkurin Juyin Mulki Bai Gudu Ba –Lauya

2021-01-09 17:00:49
Mali: Tsohon Firayi Minista Da Ake Zargi Da Yunkurin Juyin Mulki Bai Gudu Ba –Lauya

Lauyan tsohon firayi ministan kasar Mali Boubou Cisse da ake zargi da hannu cikin makarkashiyar kifar da gwamnatin rikon kwarya ta kasar ya musanta cewa tsohon firayi ministan ya gudu daga kasar bayan da babban mai shigar da kara na kasar ya zarge shi da kokarin juyin mulkin.

A ranar 31 ga watan Disamban da ta gabata ce mai shigar da karar ya bayyana cewar ana gudanar da bincike kan wasu mutane bakwai ciki kuwa har da tsohon firayi minista Cisse saboda zargin kulla makarkashiya ga gwamnatin rikon kwaryar, inda ya ce biyar daga cikinsu suna tsare amma shi firayi ministan ya tsere.


Yayin da yake mayar da martani kan wannan ikirarin, daya daga cikin lauyoyin Mr. Cissen, Marcel Ceccaldi ya bayyana wa manema labarai cewa wanda yake wakiltan yana nan a birnin Bamalo kuma cikin koshin lafiya.


Shi ma a nasa bangaren Mr. Cisse, a wata hira da yayi da gidan radiyon Jamus ya ce yana nan a kasar Mali sai dai bai fadi inda yake ba, yana mai cewa jami’an tsaro sun zo gidansa a lokacin ba yana nan inda suka ci zarafin mutanen da suke gidan, wanda hakan ya sanya ne neman mafaka.


A ranar 18 ga watan Augustan da ya gabata ne dai sojoji suka kifar da gwamnatin tsohon shugaban kasar Ibrahim Boubacar Keita sakamakon rikicin siyasar da ya kunno kai a kasar, sai dai kuma sakamakon matsin lamba sojojin sun mika mulki ga gwamnatin rikon kwarya ta kasar.


015


Comments(0)
Success!
Error! Error occured!