Amurka: Majalisar Dokoki Ta Tabbatar Da Joe Biden A Matsayin Zababben Shugaban Kasa
Rahotanni daga kasar Amurka sun
tabbatar da cewa, majalisar dokokin kasar ta tabbatar da Joe Biden a matsayin
wanda ya lashe zaben shugaba kasar a hukumance, bayan da majalisar ta ci gaba
da zamanta, biyo bayan farmakin da magoya bayan Trump suka kaddamar kan
majalisar, inda suka hana majalisar gudanar da zama.
Mutane 4 aka tabbatar da sun rasa
rayukansu sakamakon tarzomar da magoya bayan Donald Trump suka tayar a cikin
ginin majalisar dokokin kasar a birnin Washington, a lokacin da ‘yan majalisar
ke gudanar da zama domin tabbatar da nasar nasarar Joe Biden.
Farmakin magoya bayan Trump dai ya
tilasta majalisar dakatar da zaman da take gudanarwa dangane da sakamakon zabe,
inda Trump din ya rika zuga su da kuma tunzura su domin su kawo cikas ga zaman,
wanda ya yi imanin cewa za a tabbatar da Joe Biden a matsayin wanda ya lashen
shugaban kasar da aka gudanar.
Daga bisani bayan da jami’an tsaro
suka samu nasarar fitar da masu tarzomar, majalisar ta ci gaba da gudanar da zamanta.
Kungiyar tarayyar turai ta yi
Allawadai da abin da ya faru, tare da bayyana hakan a matsayin keta hurumin
dimukradiyya, tare da kira ga bangarorin da suka sha kayi a zaben da amince da
shan kayin da suka yi, maimkaon tayar da tarzoma.
A nasa bangaren zababben shugaban
kasar ta Amurka Joe Biden ya bayyana abin da yake faruwa da cewa, hari ne aka
kaddamar kan dimukradiyyar Amurka.
Shugabannin kasashen arewaci da
kudancin Amurka duk sun yi Allawadai da kakkausar murya kan abin da Doald Trump
da magoya bayansa suka yi.
Sakamakon abin da ya faru a daren
jiya, wasu daga cikin manyan jami’an gwamnatin sun yi murabus daga kan
mukamansu domin nuna rashin amincewarsu da abin da ya aikata, daga ciki har da babbar
sakatariyar hulda da jama’a ta fadar White House.
Za a ranatsar da Joe Biden a
matsayin sabon shugaban kasar Amurka aranar 20 ga wannan wata na Janairu da
muke ciki na shekarar 2021.
Bayan matakin majalisa na amincewa da Biden a hukumancea matsayin wanda ya lashe zabe, a yau Trump ya ce zai amince ya mika mulki ta hanyoyi na lumana.
015
